Iñaki Zabaletaren “110. Street-eko geltokia”ren irakurraldia Hendaian

110.streeteko-geltokiaBihar, maiatzak 27, Hendaiako Mediatekan, Iñaki Zabaleta Urkiola idazle leitzarraren 110. Street-eko geltokia eleberri ospetsuaren irakurraldi publiko jarraitua egingo da, eguerdiko ordubietan hasita, arratsera arte.

Bost urte dira Hendaian euskal kulturaren alde diharduen Akelarre taldeak horrelako jendaurreko irakurraldiak antolatzen dituela. Iaz, esate baterako, Joseba Sarrionandiaren Kolosala izango da hautatu zuten irakurtzeko, eta aurten (bosgarren ekitaldian), Zabaletaren nobela.

Iñaki Zabaleta (Leitza, 1952) kazetaritzako irakasle gisa da batez ere ezaguna, besteak beste, baina haren hasierak literaturari lotuak dira. Poesiazko liburu zenbait kaleratu ondoren, 1985ean (orain hogeita hamar urte, beraz) argitaratu zuen bere lehen eta azken nobela den hau: 110. Street-eko geltokia, New Yorken bizi den euskal iheslari baten inguruko istorio poliziako bixi eta guztiz atsegina.

Susa argitaletxean plazaratu zen estreinakoz eleberria, eta bertan eduki zituen hiru edizio. Elkar argitaletxean atera zuen gero, non dagoeneko 70.000 ale inguru saldu baitira, 40 edizio baino gehiagotan, eta horrek bihurtu du euskal literaturaren historia osoko liburu arrakastatsuenetakoa, zinemara ere eraman zutena. Liburuak 25. argitaraldi egin zituenean, editoreek eta egileak goitik behera moldatu zuten testua, Euskaltzaindiaren arauetara egokitzeko, batetik, eta hainbat xehetasun hobetzeko, bestetik.

Horrek guztiak eraman du Akelarre elkartea liburu hau hautatzera irakurraldi honi begira; bertan hartuko dute parte euskal kulturako pertsona ezagunek eta Hendaia inguruko hainbat euskaltzalek. Irakurraldiak irauten duen bitartean graffitigile pare bat arituko da lanean, han ondoan. Bestalde, ekitaldiaren erdian, lau eta erdiak aldera, prentsaurreko bat eskainiko dute idazleak, antolatzaileek eta hainbat adituk. Azkenik, arratsaldeko zortziak aldera, aperitifa eskainiko zaie bertaratutako eta partehartzaile guztiei.

Partekatu albiste hau: Facebook Twitter Pinterest Google Plus StumbleUpon Reddit RSS Email

Erlazionatutako Albisteak

1 Comment

  1. Pingback: Literaturak ez du balio eskluientea izan behar | Katebegia

Utzi zure Iruzkina