Albisteak

Miren Agur Meabe, Mikel Zarate sariaren irabazle

Miren Agur Meabek idatzitako Itsasoaren atea nobelak irabazi du 2020ko Mikel Zarate haur literatura saria. Hala erabaki du Leire Bilbaok, Julen Gabiriak eta Xabier Mendigurenek osatutako epaimahaiak, eta berak eramango du 3.000 euroko saria. Liburua, berriz, Elkar argitaletxeak kaleratuko du.

Lezamako Udalak eta Elkar argitaletxeak sortu zuten sariketa hau, Lezamako seme eta euskal kulturako sortzaile eta bultzagile handi izandako Mikel Zarateren omenez, eta hamaikagarren ekitaldia izan da aurtengoa.  Lur Gallastegik irabazi zuen duela bi urte, eta epaimahaiak hutsik utzi zuen saria iaz.

Hogeita bi lan lehiatu dira guztira, maila handikoak horietako dozena erdi bat, eta horien artean Meabek idatzitako eleberria hautatu du epaimahaiak. Itsasoaren atea izeneko istorio honek XIX. mendera eramango gaitu, Atlantikoan kokaturiko Île Cormoran edo Ubarroien uharte asmaturiko batera, eta hor hainbat abentura kontatzen ditu: amodio debekatuak, pasadizo sekretuak, ihes egindako espetxeratuak, iragarletzaren dohaina duten andrazkoak, gorrotoak eta misterioak… Literatura erromantikoaren gustua dakarkiguten motibo eta gaiak, azken batean. Kontakizunaren hari guztiak bikain josteko abilezia azpimarratu du epaimahaiak, eta hizkuntza jori, dotore eta adierazkorra.

Miren Agur Meabe Plaza Lekeition jaio zen 1962an. Irakasletza eta Filologia ikasitakoa da, irakasle lanetan eta editore jardundakoa, eta gaur egun idazletzari emana bizi da. Prestigio handiko egilea da, sari ugari irabazitakoa, bai helduentzat bai haurrentzat, eta bere azken liburuak izan dira Hezurren erretura (ipuinak, helduentzat) eta Begiak zerumugan (poemak, haurrentzat).

Mikel Zarate sariaren orain arteko irabazleak:
2010 Asier Mendoza Beste gu
2011 Julen Gabiria Nire aita ikusezina da
2012 Gaizka Arostegi Urrezko orrazia
2013 Irati Bediaga Beldarren hegaldia
2014 Patxi Zubizarreta Mundua baloi batean
2015 Arrate Egaña Patioan
2016 Xabier Olaso Erraldoiak
2017 Hutsik
2018 Lur Gallastegi Saharako itsasoa
2019 Hutsik