Arian euskara ikasteko metodoko B1.1 kalean da
Arian euskara ikasteko metodoaren liburuki berri bat dagoeneko kalean da: Arian B1.1 Ikaslearen liburua, hain zuzen ere. Liburuak bost unitate didaktiko ditu. Unitate bakoitzean hiru helburu proposatzen dira, eta helburu bakoitza ekintza komunikatibo bat da. Ekintza horietan bizitza errealeko gaiak, egoerak eta testuinguruak islatzen dira; ikasleak, jarduera komunikatiboen bitartez, hizkuntza modu naturalean erabiltzeko aukera izango du. Ezinbestekoa da testuen esanahia ulertzea ekintza zuzen eta egoki burutzeko. Entzumenean oinarritutako jarduerek berebiziko garrantzia hartzen dute.
Unitate bakoitza egiteko, 25 ordu aurreikusi dira (Ikaslearen liburua + Lan-koadernoa). Dena dela, ikasle guztiek ez dituzte berdin baliatuko eskainiko zaizkien aukera guztiak, norbanakoaren beharrak eta premiak ezberdinak izango baitira uneoro.
Ikaslearen liburuko erantzunak eta transkripzioak aparte eskaintzen dira (liburuaren osagarri moduan), ikasleak eskura izan ditzan. Jarduerek erantzun bat baino gehiago badute, aukera horiek ere jasota daude. Normalean, galdera itxiak proposatu dira, baina galdera irekiak dituzten jardueretan, balizko erantzunak eman dira ia beti. Ahozko testu guztien transkripzioak ere jaso dira.
Ikaslearen liburu honi dagokion lan-koadernoa laster izango da eskuragarri.
Erlazionatutako Albisteak
- ← Enkore taldearen “Kanala” disko berria eta zuzeneko kontzertua – ZOZKETA
- Ana Malagonen “Lasai, ez da ezer gertatzen” liburuaren hitzaurrea – Iban Zaldua →