Albisteak

Irati Irizar izan da XXVI. Igartza Sariaren irabazlea

Elkar
|2023-09-13
|Iruzkinik ez

Irati Irizar, XXVI. Igartza Saria

Irati Irizar lazkaotarra izan da aurtengo Igartza Sariaren irabazlea. Hogeita sei urte betetzen ditu Elkar argitaletxeak, Beasaingo Udalak eta CAF enpresak idazle gazteak laguntzeko antolatzen duten beka honek; deialdi honetan dozena bat proiektu aurkeztu dira, eta “Ilargi-kutsadura” izeneko eleberri proiektua irabazletzat jotzea adostu dute Aintzane Usandizaga, Irati Jimenez eta Garazi Kamio epaimahaikideek.

Sariak 6.000 euroko laguntza eta lana argitaratzeko konpromisoa dakartza, eta irabazlea Irati Irizar Alvarez izan da, 1990ean Lazkaon jaioa eta bertan bizi dena. Ingeniaria da ikasketaz eta hainbat lanbidetan aritu da: irakasle, haur-zaintzaile, aholkulari, ingeniari. Literaturan, berriz, hauxe izango du lehenengo lana.

“Ilargi-kutsadura” nobela-proiektuak hainbat hari, giro eta pertsonaia lotzen ditu: Bardeako bazter lehorrak, bertan western filmak egiteko erabilitako dekoratuen hondarrak, OVNI edo OHE direlakoen ikuspenak, sekta bat, Bartzelonatik herrira ilusiorik gabe itzuli den gaztea, munduan batetik bestera dabilen emakume arrakastatsua… Horiek guztiak lotuko ditu nobela iradokitzaile bezain pertsonal honek.

Igartza Sariaren aurreko irabazleak:

Julen Gabiria: Connemara gure bihotzetan

Xabier Etxeberria: Egun denak ez dira berdin / Jasone Osoro: Korapiloak (akzesita)

Fernando Morillo: Ortzadarra sutan

Unai Elorriaga: Van’t Hoffen ilea

Julen Gabiria: Han goitik itsasoa ikusten da

Asel Luzarraga: Karonte

Karmele Jaio: Amaren eskuak / Peru Magdalena: Lile (akzesita)

Uxue Alberdi: Aulki bat elurretan

Jon Martin: Ero

Katixa Agirre: Habitat / Irati Jimenez: Nora ez dakizun hori (akzesita)

Eider Rodriguez: Katu jendea